سيارة لادا اوكا مميزات وعيوب واسعارها وتقرير شامل

admin الجمعة، 29 ديسمبر 2017

تقرير شامل عن السيارة لادا اوكا وسنتعرف على مميزات وعيوب لادا اوكا ومتوسط اسعار السيارة لادا اوكا 

مقدمه:ظهرة السيارة لادا اوكا روسية الصنع فى مصر بداية منتصف التسعينات حتى عام 2002 تقريبا ومع ان شكلها يقارب الماروتى الا انها لم تلقى نجاحا واقدم على شراءاها عدد قليل من المصريين ويرجع ذلك لضعف موتورها وندرة قطع الغيار لاهمال المستوردين استيراد قطع غيار لها فى ذلك الوقت

مميزات السيارة لادا اوكا الروسية
1- سيارة لادا اوكا صغيرة الحجم تناسب الزحام المرورى وصعوبة الركن 
2-سيارة لادا اوكا سيارة نسائية جدا لصغرحجمها وسهولة التحكم فيها
3-سيارة لادا اوكا تعتبر موفرة للبنزين لصغر سعة الموتور وحجم السيارة
4-سيارة لادا اوكا سعرها ممتاز وتعتبر اقل سعر فى موديلاتها مقانة باى سيارة اخرى
5-سيارة لادا اوكا تتمتع بالثبات النسبى مقارنتا يالسيارات الصغيرة الاخرى
6- سيارة لادا اوكا تعتبر افضل من مثيلاتها من حيث الحجم مثل السيات والفيات 126

عيوب السيارة لادا اوكا الروسية
1-السيارة لادا اوكا ذات حجم صغير وهو ما يعتبرة الكثير عيب كبير
2-السيارة لادا اوكا بابين فقط ولا تصلح للعائلات
3-السيارة لادا اوكا محركها ضعيف (750 سى سى ) ولكنة يناسب حجمها
4-السيارة لادا اوكا فقيره من الداخل وليس بها اى وسائل رفاهية
5-السيارة لادا اوكا تتطلب الكثير من التعديلات والاضافات مثل الزجاج الكهربا وتعديل الكبالن الامامية لتركيب جنوط مثلا وهو ما سيتسبب بعدم اتزان السيارة ومشكلات اخرى كثيرة
6-السيارة لادا اوكا قطع غيارها نادرة وصعب الوصول اليها وتوجد قطع غيار مش موجوده اصلا وقطع غيارها الجديدة قليلة وغالية جدا واغلب الموجود ليها استيراد (استعمال الخارج) وهتحتاج توفق عليها حاجات كتير وده بيقلل من كفائة العربية وبتكتر اعطالها
7-السيارة لادا اوكا موتورها غالى جدا ولو اتعمر مش هيكمل سنة ويعطل تانى لان العمرة بتحتاج قطع غيار اصلية ودى غالية وف حاجات مش موجوده فبيتم اضافة قطع مش بتاعة الاوكا وده هيخلى عمر المتور قليل ومش هيستحمل شغل ويعطل بسرعة ومفيش عمرة موتور بتخلية يرجع زى الاول بالعقل كده تقفيل المصنع والقطع الاصلية ول شغل المكانيكى وتوفيق وخرط قطع غير اصلية ودة فى اى عربية مش بس الاوكا ولكن فى الاوكا الموضوع بيبقى زياده شوية علشان ندرة قطع الغيار واستسهال المالك والصنايعى انو يركب اى حاجة علشان يشغل السيارة ويبعها ويخلص منها باقل خسائر.
8-السيارة لادا اوكا اكسسوارتها نادرة جدا زى قطع الغيار ولازم توفق عليها حاجات مش بتاعتها وبتركب عادى بس مش بتكون زى الاصلى وبتأثر على الشكل العام وبردو فى حاجات مش موجودة زى الفوانيس الخلفية لازم تتعمل عمولة ومكلفة جدا
9-مش اى مكانيكى بيشتغل فيها ول يقول غير كده يبقى مش فاهم لانى وديت عربيتى لمكانيكا عادى وباظ الموتور على انو لسة خارج من عمرة ودوخت بيها وملقتش حد يصلحها وكل مكانيكى يعمل فيها بيفهم وفى الاخر بعت العربية والخسارة تعدت 10000 جنية بعد 4 شهور بحاول ابعها وال خدها تاجر وال فهمتو انو هيصلحها مؤقتا بطريقة ما ويبعها لان للاسف ال بيشترى العربية دى فى الغالب بتكون اول عربية له ومعندوش خبرة (فريسة سهلة)ودة ال بيخلى تجار تشتغل فيها.
9-البارومة وهى الد اعداء اى سيارة وخصوصا لادا اوكا مفيش عربية اوكا مفهاش برومة وعلى فكرة البارومة هى صدأ وتم اهمالة واكل الصاج وبقى اسمة بارومة لان فى ملاك للاوكا يقولك مفيش بارومة وتروح تلاقى العربية مليانة صدى ودايما البارومة بتبقى مستخبية او تم دهانها فى السقف مثلا فمش هتعرف تشوفها وهتبان بعد ما تشترى وتلبس العربية ومش هتعرف تبيع الا بخسارة وعلاج البارومة صعب ومكلف .
10-خلاصة الكلام ان الشعب المصرى بيفهم جدا ولو لقى فى العربيه دى خير كنت هتلاقيها فى كل حته واكبر دليل على كدة العربية الفولكس موديلات ستينات وسبعينات ومنتشرة فى كل حته فى مصر ومفيش شارع مش هتلاقى فيه فولكس ول 127 و128 اما الاوكا فى مدن كاملة مفيهاش لادا اوكا .

متوسط اسعار السيارة لادا اوكا

اسعار السيارة لادا اوكا موديل تسعينات تصل الى 15000 جنية لو حالة ممتازة
اسعار السيارة لادا اوكا موديل الفينات تصل الى 17000 جنية لو حالة ممتازة
الحالة الممتازة يعنى موتور فبريكا متفكش قبل كدة والعربية مفيهاش بارومة(صدى) ول معجون ومش راشة سقف ومش محتاجة مصاريف ومش متعدلة يعنى بحالتها الاصلية وكمان الكاويتش فوق المتوسط لانه صعب تلاقية وفيها سنر وانذار وزجاج كهرباء وفرش ممتاز وببساطة مفيش لادا اوكا فى مصر كلها حالتها ممتازة

الاسعار دى طبعا لسنة 2018 ومايهمكش ال يقولك 25000ج والكلام ده لان العربية مش مطلوبه وملهاش سوق وانا لما كنت بشتريها (قبل ما اعرف عيوبها) كنت بكلم ناس بتقول 30 وانا كنت بقولهم 15 وبالفعل اشتريت عربية كان صاحبها طالب 29 ولسه عامل عمرة كاملة للسيارة وزجاج كهربا وفرش جديد وانذار وانا اخدتها ب 16 لانة كان بقاله 3 شهور مش عارف يبعها وموديل 2002 كمان وطبعا ال فاهم هيعرف يشترى ول مش فاهم هو ال هيلبس فى العربية دى وانا عملت الموضوع ده علشان الناس كلها تبقى فاهمه وضع العربيه دى (لو لقيت حد فهمنى مكنتش اشتريت), وخدو بالكم فى ناس (ملاك السياره ) يقعد يقول دى شبه الماروتى والكلام ده غلط تماما الماروتى انا مركبتهاش بس فى كل شارع بلاقيها وقطع غيارة فى كل حتة جديد واستيراد ومركات مختلفة وكمان 4 باب وحجمها اكبر من الاوكا وموفرة اكثر لان قطع غيارها متوفرة ورخيصة واعطالها اقل واعتمادية جدا وشكلها افضل بكتير وكل ال ساقها بيشكر فيها وسعر اعادة بيع لو مكسبتش مش هتخسر كتير واى مكانيكى بيفهم فيها لانها منتشرة وبتجيلو كتير وعلشان كده متخليش حد يوهمك انها شبة الماروتى ويقولك الفرق فى البابين الزياده والكلام الفارغ ده

ونصيحتى لو العربيه موتورها اتفتح متشترهاش وابعد عنها خالص واغلب ال بيبيع هتلاقية عامل عمره من كام شهر او العربيه فيها حاجه ومحتاجه عمره وعلشان كده هو بيبيع لانه تعب من مصاريفها ومتصدقش اى حاجة تانيه مهما حلف لان ال مش بيكدب وعربيتو سليمة مش محتاج بيحلفلك علشان تصدق وتشترى
نصيحة عن تجربة متشتريش لادا اوكا ولو معكش فلوس تكمل اصبر بدل ماتصرف ال معاك ومش هتقدر على مصاريفها ومش هتعرف تشترى حاجة تانية وتبقى خسرت فلوسك وبردو هتركب مواصلات